ᐊᖅᓯᒃᑯᑦ ᐱᖑᐊᖅᑎᖏᓐᓂᑦ ᐊᖅᑭᒃᑕᐅᓯᒪᔪᓂᒃ ᓄᑖᖑᓚᖑᔪᖅ ᑕᐃᔭᐅᓪᓗᓂ ᐊᓯᐅ, ᐅᓂᒃᑲᖅᑐᐊᕐᒥᓐ ᐊᒪᕐᑯᑉ ᓄᓈᑦ, ᒪᓕᒃᓯᒪᐸᓗᒃᑐᖅ ᐊᖅᑭᒃᓱᕐᓯᒪᓂᖓ, ᖁᖏᐊᖅᑕᐅᓚᐅᖅᑐᑦ ᐃᖃᓗᖕᓂ 2014-ᒥᑦ, ᑕᐃᒃᑯᓇᖓᓐ ᐊᓕᐊᓇᐃᑦ ᐱᖑᐊᕕᒡᔪᐊᖅᑐᓕᕆᔨᒃᑯᓐᓂ ᑐᖓᓱᒃᑎᑕᐅᓪᓗᑎᑦ.
ᕐᑯᖏᐊᖅᑕᐅᕕᖕᒥ ᐊᖅᑭᒃᓱᐃᔩᑦ
ᐅᐊᑦᑎᐊᕈᐊᐃ ᑐᑭᖃᖅᑐᖅ ᐅᑕᖅᑭᐊᓪᓚᒋᑦ, 2007-ᒥᑦ ᐱᖑᐊᖅᑕᐅᓚᐅᖅᓯᒪᔪᖅ, ᓯᕗᓪᓕᕐᒥᒃ ᐱᖑᐊᖅᑕᐅᓚᐅᖅᑐᒥᒃ ᐅᐊᕋᔮ, ᐃᓚᒋᓕᐊᕆᔭᐅᓚᐅᖅᓯᒪᔪᖅ ᓄᓇᓕᖕᓄᑦ ᐊᐅᓪᓚᖃᑦᑕᕐᒪᑕ ᐱᖑᐊᖅᑎᖏᓐ ᖁᖏᐊᖅᑕᐅᔭᖅᑐᖅᐸᒃᖢᑎᒃ, ᑕᒃᑯᐊᒃ ᐱᖑᐊᖅᑕᐅᖃᑕᐅᓚᐅᖅᑑᒃ. ᑖᓐᓇ ᑭᖑᓪᓕᐅᔪᖅ ᐅᐊᑦᑎᐊᕈᐊᐃ, ᐱᖑᐊᕐᑎᐅᓂᖏᑦ ᐱᖑᐊᕐᑕᒥᖕᓂᒃ ᓴᖅᑭᑎᑦᑎᑲᓐᓂᖅᖢᑎᒃ, ᓱᕐᓗᓕ ᑕᕐᕋᖅ ᐊᑐᖅᑕᐅᓪᓗᓂ ᐱᖑᐊᖅᑎᓪᓗᒋᑦ, ᓂᕐᔪᑏᓪᓗ ᐊᐅᓚᔾᔪᓯᖏᑦ ᐅᔾᔨᖅᓱᖅᑕᐅᓂᖅᓴᐅᓪᓗᑎᒃ ᐱᖑᐊᖅᑕᐅᔪᓂ, ᑕᕐᕆᔭᐅᓯᐅᖅᑕᐅᔪᓪᓗ ᐱᒻᒪᕆᖑᖅᖢᑎᒃ ᖃᓄᖅ ᐊᖅᑭᑕᐅᓯᒪᓂᐊᕐᓂᖓᓐ ᐊᖅᑭᒃᓱᖅᑕᐅᑦᑎᐊᖅᓯᒪᕙᒋᖅᖢᓂ ᖁᖏᐊᖅᑕᐅᓂᐊᕐᓂᐅᑉ ᑐᖔᒍᑦ. ᑕᓐᓇ ᐱᖑᐊᕐᓂᐅᔪᖅ ᖁᖏᐊᖅᑕᐅᖃᑦᑕᓚᐅᖅᖢᓂ ᐊᖅᓯᖅ ᐱᖑᐊᖅᑎᖏᑦ ᐃᓄᖕᓄᑦ ᐊᒥᓱᓄᑦ ᖃᐅᔨᒪᔭᐅᑦᑎᐊᓕᕈᑎᒋᓕᓚᐅᖅᓯᒪᔭᖓᓐ ᑕᑯᕋᓐᓂᕆᔭᐅᓗᐊᕐᓂᑯᒧᑦ ᓄᓇᕗᒥᐅᓄᓐ, ᑲᓇᑕᒥᐅᓄᓐ, ᓄᓇᕐᔪᐊᕐᒥᐅᓕᒫᓄᓪᓗᓐᓂᑦ.
ᐅᐊᕋᔮ ᐊᖅᑭᒃᑕᐅᓚᐅᖅᓯᒪᔪᖅ 2005-ᒥᑦ, ᒋᐅᓪᒻ ᓴᓚᑕᓐ ᐃᒡᓗᓕᖕᒧᑦ ᓅᓴᕐᓂᑯᑎᓪᓗᒍ. ᐅᐊᕋᔮ ᑐᑭᖃᖅᑐᖅ ᐊᑯᓂᒍᓱᒃᑐᖅ, ᐃᓄᐃᑦ ᐱᖁᓯᖏᑦᑎᒍᑦ ᐱᖑᐊᕈᓰᑦ ᑲᑎᖦᖢᑎᒃᑯᒃ ᖃᓪᓗᓈᑎᑐᑦ ᐱᖑᐊᕈᓰᑦ ᑕᐃᔭᐅᔪᖅ ᓲᑲᔅ, ᓯᕗᓪᓕᖅᐸᑦᑎᐊᕐᒥ ᐃᓄᐃᓐᓇᐅᓪᓗᑎᒃ ᐱᖑᐊᖅᑏᑦ ᐃᖃᖏᑦᑐᐊᓘᓪᓗᑎᒃ ᐊᐅᓚᖃᑦᑕᕐᓂᖏᑦ ᓴᖅᑭᔭᖅᑎᑦᑎᓪᓗᑎᒃ, ᐊᒻᒪᓗ ᐱᖓᓲᓪᓗᑎᒃ ᑲᑲᖃᑦᑕᐅᑎᓪᓗᑎᒃ ᐳᖅᑐᓯᓯᒪᓪᓗᑎᑦ (Three Man’s High). 2006-ᒥᑦ ᐃᓄᐃᓐᓇᐅᑦᑎᐊᖅᖢᑎᒃ ᐱᖑᐊᖅᑎᐅᖃᑎᒋᑦ ᖁᖏᐊᖅᑕᐅᔭᕆᐅᓚᐅᖅᓯᒪᔪᑦ ᕿᑭᖅᑖᓗᑉ ᒪᒃᑯᒃᑐᓕᕆᔨᒃᑯᖏᑦᑕ ᑲᑎᒪᓂᕐᔪᐊᖓᓐᓂ.
ᑲᐅᒡᔭᒃᔪᒃ ᐊᖅᓯᖅᑯᑦ ᓯᕗᓪᓕᖅᐸᐅᕐᖓᐅᑎᒋᓪᓗᓂᐅᒃ ᐱᖑᐊᖅᑕᐅᓚᐅᖅᓯᒪᔪᖅ ᐃᓄᖕᓄᑦ ᖁᖏᐊᖅᑕᐅᓪᓗᑎᑦ, 2004-ᒥᑦ. ᐅᓂᒃᑲᖅᑐᐊᕐᒥᒃ ᒪᓕᒃᖢᑎᒃ ᑲᐅᒡᔭᒃᔪᒃ, ᓄᑲᑉᐱᐊᑯᓗᒃ ᐊᖓᔪᖅᑳᖃᖏᑦᑐᖅ, ᑕᖅᑭᐅᑉ ᐃᓄᐊᓄᑦ ᐊᐃᔭᐅᓐᓂᖅᖢᓂ ᓇᒡᓕᒋᔭᐅᖃᑦᑕᓕᕐᓂᕋᒥ ᓯᐊᓛᕆᔭᐅᖃᑦᑕᕐᓂᖓᓐᓄ, ᐅᑎᖅᑎᑕᐅᒐᒥᓗ ᓄᓇᖓᓐᓄᑦ ᑕᐃᒃᑯᐊ ᐱᑦᑎᐊᖅᐸᓚᐅᖏᑦᑐᑦ ᑐᖁᕋᕐᓂᖅᖢᓂᒋᑦ, ᓇᓄᕐᓂᒃ ᐃᑲᔪᖅᑎᖃᖅᖢᓂ. ᓯᕗᓪᓕᕐᒥ ᖁᖏᐊᖅᑕᐅᔭᕆᐅᖅᑎᓪᓗᒋ ᐱᖑᐊᖅᑏᑦ, ᖁᕕᐊᒋᔭᖃᓚᐅᖅᓯᒪᔪᑦ ᓯᕿᓂᖅ ᓄᐃᑕᓱᔭᓛᖑᓂᖓᓐᓂ ᐊᕐᕋᒍᖓᑦᑕ ᐃᓗᐊᓂ. ᐱᖑᐊᖅᑎᑯᓗᖏᓐ ᐊᕙᑎᐅᓪᓗᐊᓚᐅᖅᓯᒪᔪᑦ ᓂᕕᐊᖅᓵᑦ, ᓄᑲᑉᐱᐊᑦ, ᒪᒃᑯᒃᑐᓪᓗ ᑲᑎᖦᖢᑎᒃ.